Кімі Райканен грунтоўна падышоў да свайго паўнавартаснага дэбюту ў Чэмпіянаце сьвету па ралі (WRC), і акрамя звычайных тэстаў, прыме ўдзел у Arctic Lapland Rally – адным з этапаў нацыянальнага фінскага першынства. У гэтай знакамітай гонцы, якая праходзіць на мяжы Палярнага круга, Кімі будзе выступаць за рулём Citroen C4 WCR.

Кай Ліндстром (штурман Райканена): “Arctic Lapland Rally – ключавы этап у нашай праграме падрыхтоўкі. Мы ўжо выступалі тут на Fiat, і больш-менш ведаем трасу. Так што ралі стане добрай магчымасьцю прызвычаіцца адзін да аднаго, а для Кімі яшчэ і патрэніравацца ганяць па стэнаграме”.

“Ён не езьдзіў на слых з Ралі Фінляндыі. Наколькі я ведаю, маршрут Arctic Lapland Rally сёлета не зьмяніўся, і мы зможам выкарыстоўваць леташнюю стэнаграму”.

Стыў Робэртсан (мэнэджэр Райканена): “Mercedes GP хацелі падпісаць кантракт з Кімі. Проста да таго моманту ён ужо вырашыў выступаць у WRC. А калі Кімі прымае нейкае рашэньне, то ён ужо не адмаўляецца ад яго”.

У той жа час кіраўнік каманды Ferrari Стэфано Дамэнікалі сказаў, што Райканен ужо даўно марыў сесьці за руль ралійнага аўто.

Стэфано Дамэнікалі (Ferrari): “На працягу некалькіх гадоў Кімі казаў мне пра гэта. Ён заўсёды жадаў выступаць у чэмпіянаце WRC. Думаю, у наступным годзе ён зможа пераканаць усіх скептыкаў. На мой погляд, Кімі адразу зможа паказаць нядрэнныя вынікі. Ён таленавіты гоншчык. І гэтыя якасьці ён зможа прадэманстраваць у ралі”.

Французская прэса піша аб цікавых чутках з нагоды магчымага ўдзелу Кімі Райканена ў легендарнай гонцы 24 гадзіны Ле Мана ў 2010.

Калі верыць гэтым чуткам, яго напарнікам стане дзейсны чэмпіён WRC Себастьян Лёб, які нядаўна ўжо правёў тэсты на прататыпе. Мяркуецца, што гоншчыкі сядуць за стырно Peugeot 908 HDI.

Citroen і Peugeot ўваходзяць у адну карпарацыю – PSA Peugeot Citroën, суадносна маюць агульную аўтаспартыўную праграму.

Былы пілот Формулы 1 перайшоўшы ў WRC, Кімі Райканен можа стаць пілотам заводзскай каманды Citroen пасля 2010 году, калі ён зможа дасягнуць значных посьпехаў у наступным сезоне. Аліўе Кюнель, кіраўнік каманды Citroen, пацьвердзіў паведамленьні пра тое, што Кімі падпісаў кантракт толькі на 2010 год. Аднак удакладніў, што, калі справы пойдуць, фін ня супраць працягнуць кантрактныя дамоўленасьці і на далей.

Аліўе Кюнель (Citroen): “Мы не патрабуем ад яго немагчымага ў наступным сезоне, але празрыста ясна, што калі ён даможацца прагрэсу і прадэманструе неабходны ўзровень, ён зможа патрапіць у асноўную каманду ў 2011″.

Сезон-2010 Кімі Райканен правядзе ў камандзе Citroen Junior, у той час як за старэйшую каманду Citroen будуць выступаць Даніэль Сордо і Себасцьян Лёб.

Паводле штогадовай Autosport Awards у намінацыі найлепшае ралійнае аўто перамог Citroen C4. Менавіта на гэтай мадэлі Себасцьян Лёб заваяваў чарговы чэмпіёнскі тытул WRC.

На цырымоніі ўзнагароджаньня, якая адбылася ў Лондане, ганаровы трафей з рук Ары Ватанена атрымаў дырэктар Сітраен у Брытаніі Гары Сэвідж.

Гары Сэвідж (Citroen): “Мы заваявалі чэмпіянат пяты раз, гэта быў неверагодны сезон для ўсіх людзей у Citroen. Думаю, што ў наступным годзе, калі за нас будзе выступаць Кімі Райканен, пілот і чэмпіён Формулы 1, усё будзе яшчэ больш захапляльным”.

Новы штурман Кімі Райканена Кай Ліндстрэм сьцвярджае, што яго напарнік – не тыповы пачатковец WRC, а дасьведчаны і таленавіты гоншчык. Аднак варта прызнаць, што ў ралі свая спецыфіка і зьмена гоначнай дысцыпліны – сапраўдны выклік для Кімі.

Кай Ліндстрэм: “Вядома, гэта сапраўдны выклік, але на ралі Фінляндыі ён прадэманстраваў, што прыходзіць у WRC з іншым узроўнем падрыхтоўкі, чым іншыя пачаткоўцы. Але стварэньне стэнаграмы стане выклікам для Кімі. Ён павінен будзе зрабіць усё безпамылкова на ўсіх 12 ралі”.

Таксама, па меркаваньні Ліндстрэма, Кімі мусіць хутка запамінаць маршруты. Дасьведчаныя гоншчыкі знаёмыя з трасамі лепш пачаткоўцаў і здабываюць з-за гэтага вялікую перавагу.

Новы сезон стартуе ў лютым 2010 у Швецыі. Аднак у якасьці падрыхтоўкі да сезону Кімі Райканен прыме ўдзел у ралі Лапландыі, якое пройдзе з 28 па 30 студзеня.

Photo by by Wenny118 (WRC 2009)

Кімі Райканен падпісаў кантракт з камандай Citroen Junior Team. Чэмпіён Формулы 1 зараз будзе ганяць на Citroen C4 WRC.

У наступным сезоне фін праедзе 12 з 13 этапаў WRC – усе гонкі, акрамя этапу ў Новай Зеландыі. Партнёрам Кімі па Citroen Junior Team стане Себасцьен Ож’е. З якім штурманам будзе выступаць Райканен у наступным сезоне – пакуль не ўдакладняецца. У сваёй першай гонцы чэмпіянату – Ралі Фінляндыі, які прайшоў у ліпені, ён выступаў з Каем Ліндстрамам. Праўда ў той гонцы фінскі экіпаж не даехаў да фінішу, выляцеўшы з трасы на апошнім суботнім допе. Да гэтай аварыі фінскі пілот займаў трэцяе месца ў заліку групы N.

Кімі Райканен: “Я вельмі хацеў правесьці ў ралі нейкі этап сваёй кар’еры, дзякуючы Red Bull у мяне з’явілася магчымасьць сесьці за руль найлепшай машыны – Citroen C4. Гэта новы, захапляльны выклік. Пакуль мы падпісалі толькі аднагадовы кантракт, паглядзім, як усё складзецца. Я з нецярпеньнем чакаю тэстаў і старту першай гонкі”.

Фота з сайту F1news.ru

У італьянскай Монцы адбылося Монца Ралі, у якім прыняў удзел шматразовы чэмпіён MotoGP Валянціна Росі на Ford Focus RS WRC.

Росі й яго штурман Карла Касіна ўжо выйгравалі Монца Ралі ў 2006 годзе. Сёлета Валянціна таксама быў вельмі блізкі да перамогі, але памылка, дапушчаная практычна пад фініш гонкі прывяла да развароту і страце першага месца. Перамога ж дасталася заводзкаму гоншчыку Audi Рынальдо Капэла, які выступаў у Монцы на Citroen C4 WRC.

Валі традыцыйна ўдзельнічае ў ралі-спрынце ў Монцы, пачынаючы з 1995 года, у якім ён упершыню стаў чэмпіёнам сьвету па матагонках у класе 125 кубікаў.

Таксама на рахунку італьянца лічацца тры выступы на этапах WRC, паказаўшы найлепшы вынік на ралі Новая Зэляндыя 2006 году на Subaru Impreza. Тады Валі стаў 11-тым па выніках ралі.

У наступным годзе таксама чакаецца зьяўленьне Росі на адным з этапаў WRC. Плануецца, што гэта будзе ралі Мексіка. А баявой машынай матагоншчыка ізноў стане Ford Focus RS.

Photo © Luigi Bianchetti

Буйнейшыя аўтаспартыўныя медыя паведамляюць, што чэмпіён Формулы 1 2007 года блізкі да падпісаньня кантракту з французскай ралійнай камандай на сезон-2010. Райканен і яго мэнэджары выразна далі зразумець, што наступны год фін жадае правесьці ў Чэмпіянаце Сьвету па ралі – WRC.

Аднак бос Citroen Racing Аліўе Кюнель абверг чуткі пра заключаны кантракт з Кімі. Паводле яго словаў, фін нават не кантактаваў з французамі.

Аліўе Кюнель (Citroen Racing): “Нічога не падпісана, і я нават не размаўляў з Райканен па тэлефоне. У любым выпадку, нават калі б Райканен падпісаў кантракт з Citroen, яму б прыйшлося выступаць не ў афіцыйнай камандзе, а ў юніёрскай. Проста вакол гэтага стварылі велізарную шуміху”.

У той жа час Кюнель прызнаў, што гэта ўсё больш чым проста чуткі, гэта рэальная магчымасьць і яму было б прыемна ўбачыць Райканена ў чэмпіянаце WRC.

Аліўе Кюнель: “Ён бы не стаў чэмпіёнам сьвету ў Формуле 1 выпадкова. Летась ён нядрэнна выступіў у Фінляндыі за рулём машыны класа Super 2000. Калі ён стане ралійным пілотам, то гэтыя навіны будуць вельмі добрымі для нашага чэмпіянату. Было б прыемна ўцерці нос Формуле 1″.

Пасьля няўдачы ў перамовах з McLaren Кімі Райканен заявіў, што не плянуе пераходзіць у якую-небудзь іншую каманду Формулы 1 і хутчэй за ўсё працягне сваю кар’еру ў WRC.