Pirelli можа сысьці з WRC пасьля 2010

Бос Pirelli Motorsport Пол Хэмбэры прызнаўся, што няма ніякіх гарантый адносна працягу праграмы кампаніі ў WRC. Трохгадовы кантракт паміж арганізатарамі WRC і кампаніяй Pirelli мінае ў наступным сезоне, і кампанія разгледзіць тэндарную прапанову FIA на сезоны 2011-2013, але укладаньне шыннікам чарговых EUR 11 000 000 ў WRC вельмі малаверагоднае.

Пол Хэмбэры (Pirelli): “Мы канешне сядзем і разгледзім дакумент, але сьвет моцна зьмяніўся з моманту падпісаньня мінулай дамовы. Мы ацэнім нашу цікавасьць да спорту і вымерны эфект ад існага кантракту на пастаўкі шын у WRC. Тады я змагу падаць інфармацыю радзе дырэктараў Pirelli, але не факт, што мы атрымаем станоўчы адказ. Не забывайце, што нам прыйшлося зачыняць фабрыкі і звольніць шмат людзей. Часам спорт адыходзіць на другі план. Гэта толькі фінансавае пытаньне”.

“Мне падабаецца, як развіваецца спорт. ISC у якасці прамоўтара проста пышная, гонкі праходзяць выдатна, каляндар – лепш не прыдумаеш. Але калі вы жадаеце пачуць, што я сяду і падпішу дамову яшчэ на тры гады, тое гэта не так. Мы заставаліся ў спорце, нават калі ў нас былі складаныя гады, заставаліся, калі была малая колькасьць удзельнікаў, заставаліся, калі былі праблемы з календаром. Але цяпер трэба падумаць”.

Крызіс моцна паўплываў на ўсю аўтаіндустрыю і аўтаспорт. Раней аб сваім намеры пакінуць чэмпіянат Формулы 1 пасьля 2010 заявіў японскі шыннік Bridgestone.

3.12.2009    Ралі WRC   – Pirelli